Cremonini al à sielt dôs voltis il Friûl

Un dai cjantautôrs talians plui amâts, il simbul de gjenerazion musicâl dai Agns Nonante, al à anunziât la sô cetant spietade tornade su lis senis cuntun gnûf toc e il tour intai stadis pal 2025. Compagn di ce che al è sucedût za cun altris artiscj, al sarà il Stadi “Teghil” di Lignan a dâ acet ae prime date di Cesare Cremonini, ai 8 di Jugn dal 2025, prime di cualchi conciert che al sarà fat tal Sud, di Napoli a Bari, fint in Sicilie. Il Friûl al è presint ancje intal video dal gnûf toc di Cremonini, “Ora che non ho più te” (Cumò che no ai plui te), zirât di Enea Colombi inte zone dai Magredis de Ciline. I biliets pal conciert – inmaneât di Live Nation cun FVG Music Live e VignaPR, in colaborazion cun PromoTurismoFVG e la Citât di Lignan – a saran in vendite des 11 di buinore di vinars ai 27 di Setembar, in rêt su Ticketone.it, Ticketmaster.it, Vivaticket.com e in ducj i ponts vendite autorizâts. (A.I.) – 23.09.2024