Cristicchi al cjante Battiato cuntune band dute furlane

Al torne in regjon il cjantant e atôr Simone Cristicchi cun ‘Torneremo ancora’, un viaç musicâl ae ricercje de essence inte confusion de modernitât. Il ‘conciert mistic’ par Franco Battiato al è ispirât al repertori spirituâl dal grant Mestri: une ereditât preziose, intune gnove vieste rangjade dal furlan Valter Sivilotti. Cun Cristicchi e Amara ae vôs, a son dopo i soliscj de Academie Naonis di Pordenon (Lucia Clonfero, Igor e Alan Dario) e ancje i nestris U.T. Gandhi aes percussions e il sopran Franca Drioli. Joibe ai 16 il spetacul al sarà al Teatri Odeon di Tisane, il dì dopo a Glemone, sabide a Cividât e domenie ai 19 a Mugle. (A.I.) – 15.03.2023