Cu la Vierte al rive il disc di U.T. Gandhi

Al ven fûr pal prin dì de Vierte il gnûf disc di U.T. Gandhi, il baterist jazz di Osôf nassût Umberto Trombetta tal 1960, che in dut al è sunât in passe 170 discs, ma ‘nd à fats dome cul so non di art uns vincj. Il prin, fat dut di bessôl e cuntune maraveose foto storiche di Tina Modotti in cuviertine, al è jessût te seconde metât dai agns Nonante. L’ultin, “Farewell dance”, al ven fûr daspò di cuasi cuindis agns di lavôr e pinsîrs, pe etichete Artesuono di Stefano Amerio, e al sarà presentât domenie ai 23 di Març tal Museu des aghis di Talmassons, tal dopomisdì. Tun prin moment, il disc al veve di intitulâsi “Farewell” (“Adiu”), ma po dopo al è deventât “Farewell dance”, cuntune fotografie di cuviertine fate sul fuart di Osôf, un dai lûcs dal cûr di U.T., là che al à sunât dispès. Ancje i tocs di chest lavôr: ducj fats di bessôl, sunant percussions, computer e eletroniche e contant la sô storie in Friûl e ator pal mont. (A.I.) – 20.03.2025