Dario Zampa al conte e al cjante la sô cariere

Al debute vinars ai 13 tal Auditorium “Alla Fratta” di S. Denêl “Lâ vie”, il spetacul conciert antologjic di Dario Zampa, dulà che i tocs e lis storiis dal cjantautôr furlan a saran acompagnâts dai intervents di Angelo Floramo, dai sunadôrs Sebastiano Zorza ae armoniche, Omar Malisan ae ghitare, Andrea Grosso al bas, Nicole Masolini aes percussions e la vôs di Grazia Rapetti. “Lâ Vie” al è un spetacul dut in lenghe furlane che, traviers monolics e cjançons, al ripasse i moments plui significatîfs de lungje cariere artistiche di Dario, leantlu al teme plui ampli de trasformazion de identitât furlane intun contest di cambiament cence padin. Il spetacul al tornarà intal circuit dal Ert ancje intal 2025: ai 18 di Fevrâr tal Teatri “Sociale” di Glemone, ai 19 tal Maurensig di Tavagnà e ai 15 di Març tal Auditorium Comunâl di Çopule. (A.I.) – 12.12.2024