Dîs agns di ghitaris a Pordenon

Decime edizion pe “Segovia Guitar Week”, une rassegne internazionâl di ghitaris nassude e disvilupade a Pordenon in graciis de Segovia Guitar Academy e pussibil cul jutori de cooperative Polinote e la poie dal Comun. I prins dîs agns dal festival a àn viodût passâ in citât lis ecelencis assoludis dal mont dal strument a sîs cuardis: conciertiscj di innomine mondiâl, talents, insegnants di grande esperience e musiciscj ancje une vore zovins che a rivin di ogni bande dal mont. Par fâ fieste par chest complean, la rassegne si presentarà cun events ufierts in doi timps, vie pe Vierte e te Sierade, e slargjant i lûcs dai concierts ancje in altris comuns de ex provincie. Il prin apontament al sarà “La città delle mille corde” (La citât des mil cuardis), un laboratori di musiche par esperts che al tirarà dongje passe 80 students di Italie e Austrie sabide ai 20 e domenie ai 21, cuntun conciert finâl. (A.I.) – 19.04.2024