Doi dîs tal ricuart di Robert Miles

Une serade speciâl, par memoreâ Roberto Concina, cognossût dai passionâts di musiche di discoteche dai agns Nonante cul non di Robert Miles. Par l’autôr di “Children” e di cetancj altris sucès, muart masse adore tal 2017, il “Comitato Robert Miles Fagagna”, che i à za dedicât seradis, une cunvigne e fintremai une plaçute verde devant di palaç Pico a Feagne, al à inmaneât un omaç dut in musiche. “Robert Miles Tribute”, vinars ai 28 in ocasion dai otante agns de sagre di Cjamp Taboghe, a Glemone, e sarà une serade par balâ in so non cu la musiche di Michele Parisi e Atomic Dj e la ospite Deborah Lizzi, che e sunarà il violin eletric. Sabide ai 29 invezit e je previodude une viertidure straordenarie de mostre museu nassude tal so non inte vile Orgnani Deciani a Vilalte, coordenade dal centri culturâl “Amici della Musica” di Feagne. Dentri de mostre museu, screade l’an passât e ancjemò in spiete di deventâ un spazi permanent, si puedin viodi la sô stanziute di frut, i premis internazionâi vuadagnâts, lis primis stampis dai siei tocs, une schirie di fotografiis fatis dilunc di dute la sô cariere e il piano origjinâl doprât par scrivi “Children”. (A.I.) – 27.03.2025