Doi pianos in viaç ae ricercje di Bach

Doi pianos par un viaç inte musiche di Bach. Joibe ai 11, il cartelon di musiche de stagjon dal Teatri “Verdi” di Gurize si siere cun “Bach is in the air”, un progjet che al nas de scomesse di doi pianiscj di divierse culture, un classic e chel altri jazz. Il risultât al è un dialic sospindût, in ecuilibri sul fîl des melodiis dal compositôr baroc. Un spetacul là che Ramin Bahrami e Danilo Rea a proietin la opare di un dai musiciscj plui grancj di simpri intune dimension gnove, che e passe lis epochis e lis culturis e e torne a afermâ la modernitât e la universalitât dal compositôr. (A.I.) – 10.04.2024