Dôs capitâls de culture, anzit trê

Il festival “Nei suoni dei luoghi” (Intai sunôrs dai lûcs) al cjale a Gurize e a Gnove Gurize Capitâl europeane de culture, passant pe capitâl atuâl, la estone Tartu, cul prin conciert dal cicli speciâl dal titul “Di Tartu 2024 a GO!2025”, une schirie di avigniments che e metarà dongje trê citâts e trê nazions intal segn de culture e de musiche. L’apontament al è par sabide ai 29 a Tisane, inte Ex Stazion ipiche cul conciert dal titul “Music Party”. Une fieste de musiche, incentrade su la valorizazion di talents zovins. Sul palc lis zovinis promessis de musiche classiche europeane e artiscj di nivel internazionâl tant che Alessandro Carbonare (clarinet), Valentina Danelon (violin), Cristian Gualco (violin), Gloria Campaner (piano) e Alessandro Taverna (piano). (A.I.) – 28.06.2024