Dôs ‘primis’ su la place dal ex confin

La Place de Transalpine, un lûc une vore simbolic che al zonte lis citâts di Gurize e Nova Gorica, e da acet joibe ai 14, aes 8 sore sere, la prime assolude dal progjet transfrontalîr “GO! Borderless Opera Lab”: dôs gnovis oparis di musiche di cjamare che a frontin il teme dal confin e de identitât dal teritori. Intal segn de cooperazion transfrontaliere – al centri dal Piccolo Opera Festival –, il progjet al è nassût dentri de Capitâl europeane de culture GO! 2025, che lu à finanziât e metût in maniere uficiâl tal calendari des sôs ativitâts. I autôrs des dôs oparis, che a saran sunadis de GO! Borderless Orchestre, a son la compositore, diretore di orchestre e pianiste Sara Caneva (“Radice Posizione Distanza”) e il pianist Juraj Marko Žerovnik (“Davanti alla legge”). (A.I.) – 12.09.2023