Duet “familiâr” inte glesie di S. Pio X

“Armonie in Città” al continue il so viaç tra lis corts e lis glesiis di Udin, fasint tape te glesie di S. Piu Decim, martars ai 20 aes 8.45 sot sere. A sunâ al sarà il Duet Molaro, zovine formazion di musiche di cjamare, componude di doi fradis: la violonceliste Anna Molaro e il pianist Giovanni Molaro, za cognossûts pe lôr ativitât di ecelence musicâl e didatiche, “cressûts” inte classe di musiche di cjamare de Fondazion “Luigi Bon” di Culugne. I doi a proponaran un conciert che al cjale ae Russie, ae Estonie e ae Norvegje, cun autôrs vivûts tra Votcent, Nûfcent e ancje al dì di vuê, cun rimants ae dimension flabistiche des culturis nordichis. (A.I.) – 19.08.2024