Cjantautôr, musicist, comic, dopleadôr, atôr, condutôr televisîf e cjantant dal grup Elio e le Storie Tese, Elio al è un dai plui preseâts e amâts artiscj de sene taliane. Dopo il sucès a teatri intes ultimis dôs stagjons cun “Ci vuole orecchio” e dopo jessi tornât sul palc cu la sô band, jemplant lis placis talianis principâls, l’artist al va cumò in sene cun “Quando un musicista ride”, il so gnûf spetacul teatrâl che joibe ai 9 al rive sul palc dal Teatri gnûf “Giovanni da Udine” pe uniche date in Friûl-Vignesie Julie, inmaneade di VignaPR e FVG Music Live. Elio e la sô band di virtuôs une vore zovins, cu la regjie di Giorgio Gallione, a zuin e a ridin cu la musiche e cu lis cjançons. Si divertissin a esplorâ e a tornâ a inventâ chel repertori comic imens, ai confins tra cjant e discjant che, soredut tor dai agns Sessante, al à passât la musiche, la cjançon, il cabaret e il teatri talian: Fo, Gaber, Jannacci, Cochi e Renato, I Gufi, Felice Andreasi e une schirie di altris nons, une gjenerazion di artiscj ecentrics e cuintri aghe. (A.I.) – 08.01.2025
Foto di L. Pozzo
