Fieste de Crôs Rosse cu lis musichis dai Beatles

Miercus ai 8, il Comitât di Pordenon de Crôs Rosse Taliane al celebre i 160 agns de Associazion Nazionâl e la Zornade Mondiâl de Crôs Rosse e de Miezelune Rosse cuntun grant conciert programât tal Teatri “Verdi” di Pordenon. “All you need is love” al viôt protagoniste la vôs intense de cjantante jazz e soul Sarah Jane Morris, compagnade dal Solis String Quartet (Vincenzo Di Donna, Luigi De Maio, Gerardo Morrone e Antonio Di Francia), ducj impegnâts intun repertori di cjançons e musichis dai Beatles. Il conciert al vûl jessi une dediche ae fuarce e ae essence dal volontariât, un invît a dute la citadinance a partecipâ par cjapâ a bracecuel dute la grande famee de Crôs Rosse e i siei principis fondamentâi, celebrâts ai 8 di Mai in dut il mont. (A.I.) – 07.05.2024