For Disore al celebre il “Stradivari dal oboe”

Cuatri concierts e une conference dedicade a Giovanni Maria Anciuti, il “Stradivari dal oboe”, vinars ai 23 li dal Centri visitis dal Parc des Dolomitis Furlanis, là che a vignaran contâts i risultâts des ultimis ricercjis su la vite dal costrutôr di struments musicâi nassût intal Sîscent a For Disore, che la seconde metât di Avost al inmanee un calendari dut plen, dedicât propit al so concitadin cussì impuartant, in graciis dal Anciuti Music Festival. A screâ cheste part dal festival e je la Anciuti Baroque Academy, dedicade al studi e al aprofondiment de musiche baroche su copiis di struments antîcs. Il prin conciert si tignarà joibe ai 22 tal Santuari de Madone de Salût di For Disore cui arlêfs de Anciuti Baroque Academy, intant che vinars ai 23 i docents a saran protagoniscj di un conciert dentri dal cartelon di Carniarmonie dal titul “Le Triosonate”. (A.I.) – 20.08.2024