Fresu a Udin al conte in musiche Miles Davis

Al è za cuasi dut plen il cuart apontament de rassegne “Note Nuove” inmaneade de associazion Euritmica, miercus ai 11 tal Teatri Palamostre di Udin: “Kind of Miles” di e cun Paolo Fresu. Il grant trombetist e scritôr, une des personalitâts musicâls plui impuartantis dal senari jazz di cumò nazionâl talian e internazionâl, al sarà sul palc cun musiciscj di esperiencis diviersis, cuntun spetacul che al riclame l’univiers creatîf e visionari di Miles Davis e che al ricostruìs la sô vite e la sô musiche traviers l’ambient sonôr e la storie des sôs relazions artistichis e umanis. La opare musicâl e teatrâl “Kind of Miles”, direte di Andrea Bernard e prodote dal Teatri Stabil di Bolzan, e je stade componude di Fresu par contâ sul palc un artist che al à segnât il Nûfcent: une des personalitâts plui ecentrichis e influentis de storie resinte. (A.I.) – 10.12.2024