Friûl capitâl dal cine a lûs rossis, ma dome par fente

A vincjecuatri agns de sô prime proiezion, il regjist Massimo Garlatti-Costa al torne a presentâ il cine che lu à fat cognossi inte suaze des produzions cinematografichis in lenghe furlane, e no dome: “BURIS, Libars di Scugnî Vignî”. Scrit e diret dal stes Garlatti-Costa intal 2000, al è un documentari pustiç suntun paîs che nol è, e di di une fantomatiche cjase di produzion furlane di cines porno, la Toni International. E je la storie – par fente, si capìs – di un paîs in disfasiment, destinât a une lungje agonie, fint ae idee di un dai siei fîs plui creatîfs, un marangon disocupât che al trasforme Buris di paîs abandonât intune des trê capitâls mondiâls dal cine a lûs rossis! La proiezion si tignarà a viert, sabide ai 3 a Buie, te Cjase Ursella. (A.I.) – 02.08.2024