Guidi al cjante Sinatra cu lis storiis dal pari

Cjantant e atôr di alt nivel, regjist pal teatri, personaç de radio e de television une vore preseât, Gianluca Guidi al torne li dal Teatri gnûf “Giovanni da Udine” martars ai 12 cuntun spetacul che al è un omaç passionât a un dai mîts de musiche lizere, “The Voice”. “Sinatra, the Man and his Music” al è un viaç inte vite, tai amôrs e soredut i plui grancj sucès musicâi di Francis Sinatra, cognossût tant che “Frank”, nassût tal New Jersey intal 1915. Un om dibatût, ma bon di incjantâ sul palc milions di personis in dut il mont, compagnant cu la sô vôs almancul cuatri gjenerazions. Il spetacul al è une celebrazion dal artist, compagnât di un tercet di innomenâts sunadôrs di jazz: une conte in prose e musiche cuntune presince “virtuâl”, lis storiis dal pari di Gianluca, Johnny Dorelli. (A.I.) – 11.03.2024