I spetatôrs sul palc par lâ tal infier

La stagjon dal teatri “Ristori” di Cividât si siere cul public protagonist sul palc. Pe rassegne “In Scena!” dal circuit dal ERT di joibe ai 11 a domenie ai 14 di Avrîl al torne “Nel mezzo dell’inferno” (Intal mieç dal infier), un spetacul in realtât virtuâl imersive, dulà che un spetatôr ae volte, metint i visôrs e movintsi sul palc, al fasarà un viaç inte opare di Dante Alighieri. Firmât di Fabrizio Pallara – ancje regjist – e Roberta Ortolan, il spetacul al va in sene ogni 40 minûts, des 3 dopomisdì aes 10.30 sot sere. La prime part e je compagne par ducj, la seconde invezit e puarte i spetatôrs a câs in trê lûcs selezionâts tra i ambients dal Infier di Dante. (A.I.) – 10.04.2024