I zovins e la lôr bande plui “scure” tal Teatri di Orsarie

“Prime” regjonâl tal TeatrOrsaria di Premariâs domenie ai 25 par “Il Mostro”, un spetacul di teatri di mascaris e paiaçs par grancj, cun musiche sunade dal vîf, che al va a scandaiâ il teme dal discomut dai zovins. Tal mieç, la autore e atore Federica Sansevero, sul palc adun cu la musiciste Cristina Spadotto, e va a analizâ la emergjence sociâl incjarnade di chel fenomen che i disin “Neet”, ven a stâi i zovins e lis zovinis che no studiin, no lavorin e no fasin formazion (un su cinc in Italie dai 15 ai 29 agns). E ancje di chei che in Gjapon ju clamin “Hikikomori”, che a àn miôr stâ di bessôi par colpe dai bravats o par pôre di jessi judicâts di chei altris. “Il Mostro” si propon tant che un rituâl a teatri par frontâ e par parâ vie il diaul didentri, fevelant propit de bande “scure” dai zovins. (A.I.) – 24.02.2024