Il balet no finît di Pasolini

Dopo lis primis di Triest e di Udin, “Lend me your ears” al torne in sene li dal Lo Studio di Udin inte suaze de decime cuarte edizion di “Off Label”, la rassegne par une gnove danze de compagnie Arearea. Fint a joibe ai 7 di Dicembar a son in program trê replichis ogni dì, aes 5 e aes 6.30 dopomisdì e aes 8 sot sere, ognidune cuntun numar massim di 15 spetatôrs.  “Lend me your ears”, un progjet de Compagnie Arearea, al è un percors di ricercje par artistis e artiscj di clare innomine e pes gjenerazions zovinis cul intindiment di rifleti su cualchi domande fondamentâl dal nestri presint. Il nucli artistic dal spetacul al è madressût tacant di “Vivo e Coscienza” di Pier Paolo Pasolini: un lavôr no finît, scrit intal 1963, estrem pe sô sperimentazion, che al met l’inteletuâl in relazion al balet e ae danze. (A.I.) – 05.12.2023