Il Cec al fâs fieste pai siei prins 50 agns

Cincuante agns indaûr, tant par jessi precîs al prin di Lui dal 1973, al nasseve a Udin il CEC – Centro Espressioni Cinematografiche, creât di un grup di personis che a amavin il cine in dutis lis sôs formis. Un vêr grup di cinefii che al à puartât indenant, vie pal timp, une idee previdente de culture cinematografiche. Il CEC al à creât e gjestît la prime sale “di essai” de citât, il mitic “Ferroviario”, e des sôs lidrîs al à cjapât vite il “Visionario”. E propit li dal Visionario, martars ai 19, si fasarà fieste! Une fieste tra amîs, legre, informâl e un pôc nostalgjiche, dulà che si alternaran testemoneancis e contis, imagjins e videos inedits. “Bon complean, Mr. CEC!”: chest il titul de serade, si vierzarà aes 7 sore sere a jentrade libare. Tra i “goloseçs”, il recupar di un cine dal 1975, “Ogni riferimento…”, che al puarte la firme di Giancarlo Zannier, il prin president dal CEC, e che di alore in ca nol è plui stât mostrât. La proiezion e sarà acompagnade des musichis dal vîf di Carlo Barbiera, che al è stât protagonist dal cine. (A.I.) – 18.12.2023