Il cine al sielç ancjemò il Friûl, dal mâr aes monts

Il teritori dal Friûl-Vignesie Julie al è stât sielt ancjemò une volte par dôs produzions cinematografichis, dimostrant l’atrat de regjon pal mont dal cine. Il prin progjet, “Halo”, e je une serie prodote di Paramount+ che e puarte sul piçul schermi l’univiers dal videozûc che al à fat il so debut intal 2001. La produzion de seconde stagjon di “Halo” e je stade fate dal Avost passât in Islande, Ongjarie e, chi di nô, al Lât dal Predil e ai Lâts di Fusinis, dulà che la produzion si è fermade par cuasi un mês. Il secont progjet al è “Ride out”, une serie televisive ambientade intai agns ’70, che e je stade zirade a Grau (Hotel Astoria e splaze), Triest (al Caffè Tommaseo) e Gurize, ma ancje su lis culinis di Caprive e inte zone dal Cjistiel di Spesse. (A.I.) – 17.05.2023