Il cine ‘di gjenar’ al cîr spazi in 4 salis regjonâls

Sîs salis cinematografichis talianis e trê slovenis si metin intun in rêt par un gnûf progjet dedicât al public che al ame il cine ‘di gjenar’ . Grindhouse, sottitulât ‘The new european genre film is coming’, al è un dai 13 progjets selezionâts dentri di un program european costruît su trê ideis fondamentâls: inovazion, colaborazion, sostignibilitât. Il Visionario di Udin, Cinemazero di Pordenon, l’Ariston di Triest e il Kinemax di Gurize a son tra lis salis che a àn sielt di colaborâ par concuistâ un public plui ampli pal cine ‘di gjenar’, o sedi, chel di orôr, il thriller, la fantasience, che al è dificil viodi intal circuit dai cines di cualitât. I cines sielts des variis salis a saran protagoniscj di une vere e proprie competizion, di Març a Mai, cun tant di finâl. (A.I.) – 31.01.2023