Il cine di un om bessôl cuntun cjan

Federico al è un om che al à viodût la sô vite lâ a tocs. La sô femine, sorevivude a un incident che si è puartât vie i doi fîs de cubie, e je lade vie. Restât di bessôl, cul so dolôr, cence rivâ a frontâ il vueit ator di lui, al cole tal bevi e te depression fint a cuant che al decît di voltâ la sô vite. Il so riferiment al devente un cjan adotât, che al devente un amì, un pont di riferiment e la sô salvece par tornâ a fâ su’ la sô vite, lant dute di une altre bande. In struc, e je la storie dal cine “Il rimpin”, la prime opare di Gianpaolo Scognamiglio, nassût a Udin tal 1965, preseât fotograf (ancje par Mediafriuli). Il cine, che al dure une ore e al è dut par furlan, al è stât fat cuasi dut di bessôl, cence spindi masse bêçs, cul jutori dal protagonist principâl Federico Scridel dal Teatri Stabil Furlan, dai atôrs Claudio Moretti, Federica Quaglia e “un pâr di amîs”. Lis musichis a son di Massimo Silverio, il cjantautôr cjargnel che al à publicât tal 2023 un album che al à fat il zîr dal mont, “Hrudja”, e de cubie udinese Gushi & Raffunk. Joibe ai 30 di Zenâr, il cine al sarà presentât pe prime volte li dal “Visionario” di Udin par pandi il messaç dal autôr: ancje tal moment plui grivi de vite, e je simpri une pussibilitât di tornâ a tacâ. (A.I.) – 29.01.2025