Il conciert dai students de rêt intes scuelis

Un conciert event promovût de associazion culturâl Living Music e The Groove Factory, nassût di une idee de avocate Ester Soramel. Un progjet inovatîf che, traviers la musiche e la art visive, al fronte il teme de violence di gjenar cuntun lengaç emozionâl e imediât, pensât par sensibilizâ i zovins. “Respect!” al à debutât in rêt, in direte streaming cun plui di 600 students colegâts intal 2021 dilunc de pandemie, e po dopo al è stât presentât sui palcs di diviersis citâts de regjon. In graciis dal sucès, cumò al è un progjet finanziât de Regjon F-Vj, dedicât ai students des scuelis superiôrs: un spetacul che al propon 16 tocs sielts dal repertori talian e internazionâl di cjançons dai agns ’60 al dì di vuê, che miercus ai 19 al sarà presentât di buinore tal Auditorium Zanon di Udin cun dôs replichis pai students de citât. (A.I.) – 18.03.2025