Il festival dal cine orientâl al siere cuntun mestri

Dut un an di preparazion par nûf dîs di programazion, che a son za daûr a sierâsi, ma cuntun ospit cetant impuartant: il regjist Zhang Yimou, che joibe ai 2 al larà sù sul palc dal Teatri Gnûf “Giovanni da Udine” par cjapâ il premi “Gelso d’oro” (Morâr di aur) ae cariere de bande dai organizadôrs dal Far East Film Festival, la rassegne plui impuartante in Europe dedicade al cine orientâl popolâr, organizade in citât di 26 agns in ca. Zhang Yimou al à puartât simpri indenant une vision libare e totâl dal cine, cjatant intal sburt al cambiament il propri segn di continuitât. Il festival udinês al à documentât plui voltis lis sfumaduris dal so voli, e chest an lu fasarà presentant trê titui, di miercus al prin di Mai a joibe ai 2, cu lis versions restauradis di “Lanterne rosse” e “Vivere!”. (A.I.) – 01.05.2024