Il “gnotul” di Strauss cun 60 artiscj sul palc dal ‘Teatron’

Carnevâl intal segn de grande oparete tal Teatri gnûf “Giovanni da Udine”, dulà che domenie ai 2 e sarà di sene une opare mestre assolude di chest gjenar simpri tant preseât: “Il pipistrello” (Il gnotul), cu lis musichis di Johann Strauss fi, intal bicentenari de sô nassite. Il spetacul, intune gnove produzion realizade di pueste pal Teatri gnûf, al viodarà impegnadis la Orchestre Sinfoniche “Delle Terre Verdiane” e la Corâl de Opare di Parma: passe une sessantine di artiscj fra soliscj cjantants, balarins, professôrs di orchestre e de corâl, cu la regjie di Alessandro Brachetti e protagoniste principâl Nadia Ponte, par une serade di divertiment e musiche otime. Il spetacul al è prodot de compagnie Teatro Musica Novecento, fondade intal 1995 a Reggio Emilie par opare di un grup di cjantants e atôrs cuntune esperience siore, vuidâts – in chê volte tant che vuê – dal pianist e diretôr Stefano Giaroli. (A.I.) – 01.03.2025