“Spierdûts”, il gnûf spetacul dal innomenât tercet furlan Teatro Incerto, diret dal regjist Giovanni Visentin, al rive miercus ai 9 tal Teatri “Pasolini” di Çarvignan. “Spierdûts” al nas di un gnûf sodalizi artistic fra il tercet formât dai atôrs Fabiano Fantini, Claudio Moretti e Elvio Scruzzi, cun aes spalis plui di cuarante agns di cariere, e Giovanni Visentin, un dai fondadôrs dal Teatro Ingenuo, une compagnie di teatri di strade che e unive la tecniche dai paiaçs, la Comedie de Art e il melodrame. Propri Visentin al à proponût ae compagnie storiche la realizazion di une aventure strambe su la figure dal paiaç, ispirade ae esperience comune fate di zovins. E je nassude la storie di trê paiaçs, anzians e magagnâts, che si cjatin a condividi un lozament di fortune ai margjins di une grande citât: ancje se i sucès di un timp a son finîts, no si rindin e a continuin a coltivâ la lôr art. (A.I.) – 08.04.2025
Foto di A. Durigatto
