Il gnûf ‘viaç’ al piano di Remo Anzovino

Un viaç tra lis mil pussibilitâts dal piano, une esplorazion oniriche dal svol, là che il scoltadôr al è clamât a vivi la seconde vite di Icaro. “Don’t forget to fly” al è il titul dal gnûf disc di Remo Anzovino – il sest di studi dal pianist, compositôr e avocat di Pordenon – in jessude ai 12 di Mai in vinîl, Cd e su lis plateformis digjitâls principâls. Il prin album de sô cariere ad implen dome al plan al è une metafore che e tradûs in sun sclet la dibisugne dai oms di svolâ: un album nassût tant che at di amôr pal piano, pensât e componût inte dimension di un sium. Za “Nastro d’argento” 2019, cun plui di 24 milions di streaming in 180 Paîs intal mont, Anzovino al presentarà l’album al Visionario di Udin ai 19 di Mai. (A.I.) – 12.05.2023