Il miôr de danze di vuê, achì

Une serade gnove, mai viodude prime in Friûl: ai 31 di Zenâr, il Teatri “Maurensig” di Felet in comun di Tavagnà al darà acet a lis trê compagniis di danze contemporanie de regjon che a son ricognossudis dal Mic, il Ministeri talian de Culture. Arearea, Ivona e Bellanda si metaran adun par une ufierte speciâl, presentant al public un dai lôr spetacui in repertori. Une ocasion uniche par scuvierzi lis varietâts e la cualitât de sene regjonâl intun event unic, te suaze de decime cuinte edizion di Off Label”, la rassegne par une gnove danze inmaneade di Arearea. A vierzi e sarà la compagnie Ivona di Feagne cun “T.R.I.P.O.F.O.B.I.A.”, un progjet cu la coreografie di Pablo Girolami, che al indaghe la oposizion di ecuilibri e disecuilibri e vie indevant e che al à za vinçût une schirie di premis internazionâi. Si larà indevant cun “Simposio”, là che Lia Claudia Latini e Giovanni Leonarduzzi di Bellanda a compagnaran i spetatôrs intun viaç de storie, di Platone al dì di vuê. Par sierà, cuatri danzadôrs di Arearea cun “Il caos e la farfalla”, prodot cul Mittelfest e il Teatri Stabil dal F-Vj di une idee di Roberto Cocconi, tal spazi viert de instabilitât su lis alis di une pavee. (A.I.) – 29.01.2025