Il “No Borders” ancje chest an li dai Lâts di Fusinis

La vincjesime novesime edizion dal “No Borders Music Festival” e tache sabide ai 20 di Lui e fint a domenie ai 4 di Avost, par trê fins de setemane, la foreste milenarie de Valcjanâl – al confin tra Italie, Austrie e Slovenie – e sarà il teatri de rassegne che e coniughe musiche, nature e enogastronomie. Il cûr dal avigniment al sarà come simpri la musiche, che e rifletarà il spirt “cence confins”, traviers une programazion plene di apontaments di no podê pierdi, cun stelis internazionâls e iconis dal pop. Intal senari sugjestîf dai Lâts di Fusinis, si scomence sabide ai 20 cun Goran Bregović e po dopo i Morcheeba. Il dì dopo, simpri intal prin dopomisdì, Thievery Corporation e Kruder & Dorfmeister. I concierts che a vegnin a son chei di Stewart Copeland – Police Deranged For Orchestra (sabide ai 27) e Manu Chao (domenie ai 28) simpri al lât, intant che li dal “Gilberti” al sarà un Mistery Concert sabide ai 3 di Avost. Par sierâ, il Montâs al spiete pai 4 di Avost dôs stelis tant che Jan Garbarek cul so grup e Trilok Gurtu. (A.I.) – 19.07.2024