Il ‘Nûfcent’ di Baricco voltât par furlan

Ce sucedaressial se une opare tant che “Novecento” di Baricco e fos contade in lenghe furlane? Al è chel che a proponaran i artiscj Michele Zamparini e Paolo Forte, che in graciis de fuarce evocative des peraulis e de musiche a àn dât vite al spetacul “Noufcent”. L’apontament, dentri de rassegne “Passaggi” de compagnie udinese Teatro della Sete, al è previodût martars ai 4, aes 9 sot sere, inte Cort di Palaç Morpurgo a Udin. “Il spetacul – e sclarìs Caterina di Fant dal Teatro della Sete – al è une conte familiâr e intime, svicinât aes nestris lidrîs cu la sielte linguistiche, ma proietantlu intun contest insolit e inspietât, dulà che la musiche e je metafore di ecelence pal viaç”. (A.I.) – 03.07.2023