Il palc dal Teatron al devente un mont magjic sot dal mâr

“Teatro Estate”, la rassegne estive dal teatri gnûf “Giovanni da Udine”, e jentre intal vîf miercus ai 17 cun “Blu infinito”, un spetacul ideât di eVolution dance theater che al messede danze, acrobazie e tecnologjie intun program realizât di pueste pal palc udinês. Nol è un disore e nancje un disot e no esist la gravitât, ma dome un biel svol libar intal mont magjic ricreât sul palc di Anthony Heinl, il diretôr artistic e coreograf de compagnie, za dentri dai Momix. Un mont là che a son dome creaturis marinis fantastichis, animâi acuatics, alighis e corai che si impiin di lûs e fonts marins che a somein piturâts de man di un artist. Un mont striât di siums, di bielece e di maravee, un univiers misteriôs e poetic dulà che il moviment si fâs energjie libare e vitâl. (A.I.) – 16.07.2024