Il prin cine mut fat a Gurize di une regjiste

Si siere a Gurize la tierce session di “Via della Creatività”, la residence par artistis e artiscj cinematografics fate inte suaze di “BorGO Cinema”, il progjet su lis arts e i mistîrs dal cine finanziât de Regjon. Cheste edizion autunâl de residence – simpri par cure dal Palaç dal Cine – e je stade declinade al feminin, cuntune trie di protagonistis: lis regjistis Marina Spada, Beatrice Baldacci e Federica D’Ignoti, che par trê setemanis a àn lavorât sui lôr progjets dentri de sede in vie Rastello. Marina Spada e à concentrât il so lavôr sul prin episodi di une gnove serie pe television dedicade aes origjins dal cine talian. Protagoniste di chest prin episodi, dal titul “Rifare il mondo”, e je Elvira Giallanella, une vere pioniere de setime art, che tra dal 1919 al 1920 e veve zirât a Gurize il cine mut «Umanità», une pelicule di ispirazion pacifiste, un câs forsit unic di cine doprât de bande di une femine par testemoneâ la sô condane ferme di dutis lis vueris, ae epoche presentât cul pseudonim masculin di Edmond Davidson. (A.I.) – 27.11.2024