Il prin spetacul in ‘video clamade’

Il circuit Ert al da acet, di martars ai 31 a domenie ai 5 di Fevrâr, ae prime comedie in video clamade “L’uomo invisibile”, l’ultin lavôr di Edoardo Erba, cun Maria Amelia Monti e Marina Massironi. Il spetacul al larà in sene prime a Monfalcon, po dopo a Cividât, a Sacîl (dulà che al è za dut plen in prevendite), Dartigne e Cjasarse. Dilunc de pandemie, Maria Amelia Monti e veve traspuartât dal palc ae plateforme Twitch la comedie di Natalia Ginzburg “La parrucca”, cu lis dôs atoris che a recitavin in stanziis separadis. Ancje di chê esperience al è nassût “L’uomo invisibile”, une comedie che e met adun reâl e virtuâl, dulà che lis dôs protagonistis a recitin cence mai cjalâsi, involuçadis ad implen di un fonts blu. Parsore di lôr, doi grancj schermis che lis proietin intes lôr cjasis, intant che si contin lis lôr vicendis. (A.I.) – 30.01.2023