Il tango prime dal tango, ma in Friûl

La piçule rassegne “Istât” pe valorizazion de diversitât linguistiche regjonâl, propueste dal Ufici pe Lenghe furlane dal Comun di Udin, dentri dal program di “UdinEstate”, e rive al so tierç e ultin incuintri. Dopo il conciert “Daûr di une cjançon” e chel de corâl slovene Barski Oktet, miercus ai 21 inte Cort di Palaç Morpurgo al sunarà il cuartet Cûr di Veri, une formazion di chês plui interessantis e inovativis de musiche furlane dai ultins agns. Nassût di une idee dal ghitarist Leo Virgili, cun Nicole Coceancig ae vôs, il progjet si ispire ae forme plui antighe dal tango argjentin, chê nassude intes betulis di Buenos Aires, traspuartade però intal nestri Friûl. (A.I.) – 20.08.2024