Il Teatri Stabil Furlan in vore par un spetacul gjavât fûr dal frison

Il Teatri Stabil Furlan al è daûr a sierâ i ultins detais pe gnove stagjon. In particolâr, tes setemanis che a vignaran, il diretôr artistic Massimo Somaglino al sarà impegnât tes provis par preparâ une des novitâts previodudis dal cartelon 2023/2024: “Ce crodistu di fâ!”. Il spetacul al sarà une trasposizion par furlan di une opare par frison, une altre des tantis lenghis minoritariis de Europe, fevelade tai Paîs Bas. Une gnove produzion fate in colaborazion cun Compagnia Pier21 – Looewarden (de Frisie, apont) e cul jutori de Fondazione Bon. Propit par lavorâ a chest progjet gnûf a rivaran te capitâl furlane, dai 28 di Avost al prin di Setembar, Freark Smink e Klaavje Postma: il prin, atôr e dramaturc, autôr dal test e interprete; la seconde, atore e interprete ancje jê de opare frisone. (A.I.) – 25.08.2023