Il teatri tal timp de disinformazion

E torne a tacâ di Mugle la tournée in Friûl-Vignesie Julie di “Come diventare ricchi e famosi da un momento all’altro” (Cemût si devente siôrs e famôs di un moment a chel altri), l’ultin lavôr di Emanuele Aldrovandi, un dai plui preseâts zovins dramaturcs e regjiscj de sene taliane che, a nancje cuarante agns, al à vinçût za il Premi Riccione-Tondelli, il Premi Hystrio, il Premi Pirandello, il Premi Fersen e il Mari Fratti Award. Il spetacul, che al fevele dai efiets de disinformazion e dai social, al è interpretât di Giusto Cucchiarini, Serena De Siena, Tomas Leardini e Silvia Valsesia. Daspò di vê concuistât il public di Codroip e S. Vît dal Tiliment tal mês passât di Dicembar, domenie ai 12 al sarà tal Teatri “Verdi” di Mugle, martars ai 14 tal Teatri “Ristori” di Cividât, miercus ai 15 tal Teatri “Candoni” di Tumieç e joibe ai 16 tal “Lavaroni” di Dartigne. (A.I.) – 10.01.2025