Il teme dal confin al “Piccolo Opera Festival”

I apontaments dal “Piccolo Opera Festival” a van indevant intal segn de cooperazion transfrontaliere e dal superament di ogni confin. In spiete dal apontament cun “Le Villi” – la opare principâl prodote dal Festival, che al larà in sene domenie ai 30 tal Cjistiel di Spesse -, il calendari al à in program une opare melodiche sul teme dal confin, po dopo une serade a Brda cui soliscj e la orchestre dal Teatri Nazionâl Sloven di Lubiane, un cuartet vocâl masculin simpri di Lubiane e un grup di flâts di Bolzan. Miercus ai 26 al va in sene il tierç apontament de sezion “Off”, pensade par un public ampli e trasversâl: inte Sale Civiche di Cormons al debute “Canti dalla casa dei viventi” (Cjants de cjase dai vivents), firmât di Angelo Floramo (tescj) e Carlo Galante (musiche), cu lis vôs che a recitin dal Piçul teatri Citât di Sacîl e la GO! Borderless Orchestra direte di Eddi de Nadai. (A.I.) – 25.06.2024