Il “Tomadini” al vierç l’an cun Gershwin

Joibe ai 22, li dal Teatri Gnûf “Giovanni da Udine”, al va in sene il conciert di scree dal an academic dal Conservatori “Tomadini” di Udin intal segn di un grant omaç a George Gershwin a 100 agns esats de sô opare mestre “Rapsodia in Blu”, presentade pe prime volte ai 12 di Fevrâr dal 1924. Un avigniment che al cjaparà dentri passe 70 musiciscj, fra i arlêfs dal Conservatori e tancj insegnants clamâts a integrâ la Orchestre e la Big Band diretis di Valter Sivilotti, che adun cun Glauco Venier al firme ancje i rangjaments des pagjinis musicâls in program. Inte orchestre al è ancje un ospit preseât, il pianist Roberto Cappello, famôs par vê començât a sunâ a dome 6 agns inte Konzerthaus di Viene e il prin talian dopo 25 agns a vê vinçût il concors internazionâl “Ferruccio Busoni”. (A.I.) – 20.02.2024