Il “Verdi” di Pordenon al cambie la vuide artistiche de musiche

Dopo dîs agns di grandis stagjons musicâls, cun presincis nazionâls e internazionâls in esclusive par Pordenon, progjets origjinâi e di produzion, si siere la lungje colaborazion puartade indenant di Maurizio Baglini cul Teatri “Verdi”. Martars e je stade presentade la gnove vuide artistiche dal setôr musicâl dal teatri, Roberto Prosseda, nassût intal 1975, un dai pianiscj plui atîfs inte sene conciertistiche mondiâl. Un divulgadôr musicâl, un ideadôr di programazions musicâls inovativis e di respîr internazionâl. “Une figure di nivel internazionâl – al à spiegât il president, Giovanni Lessio – un musicist e un promotôr di events artistics che di ciert al podarà ancjemò di plui slargjâ la ufierte musicâl dal nestri teatri, spaziant tra i gjenars e lis gjenerazions”. (A.I.) – 24.01.2023