In Praclûs si zire un cine su Tina Modotti

Sabide ai 5 a Udin, des 7 di matine aes 8 sot sere, e sarà zirade cualchi sene di “Tina: photographe et révolutionnaire”, un luncmetraç su Tina Modotti, une des fotografis plui impuartantis dai prins decenis dal secul vincjesim, che e nassè a Udin, in Praclûs, ai 17 di Avost dal 1896. Scrit e diret di Daniela Mujica e prodot di une cjase di produzion canadese, il documentari al passe la vite de Modotti traviers imagjins, intervistis e senis animadis che a contin i moments plui impuartants de sô vite artistiche, lis storiis di amôr cun politics e artiscj e la militance politiche. Dilunc des ripresis, al sarà intervistât l’artist Franco Dal Zotto, autôr de rivisitazion artistiche de façade de cjase di nassite di Tina in via Pracchiuso 89, che e preserve e e difont la memorie storiche de fotografe e ativiste. (A.I.) – 03.08.2023