Jazz River, musiche e visitis a Polcenic

Cui che al scolte la musiche jazz nol pues pierdi un event intun borc storic, preseât tra chei plui biei de Italie. Inmaneât dal circul Controtempo, dai 13 ai 15 di Setembar al torne pe cuarte edizion “Polcenigo Jazz River”, une rassegne in lûcs diferents, tal viert e no dome, tal paîs des aghis. Vinars ai 13 tal teatri si tache cul duet formât di Giovanni Falzone (trombe) e Nadio Marenco (armoniche) e il lôr “omaç ae cjançon taliane”, sabide ai 14 incuintri cu la esploradore e scritore Antonella Giacomini e conciert dal Roberto Ottaviano Trio “Luna”. Domenie ai 15, visitis di mieze ore par scuvierzi i puescj plui sugjestîfs dal borc, un conciert di buinore cun Carlo Maver e Achille Succi e di dopomisdì cun Gianni Massarutto e Paolo Corsini. (A.I.) – 11.09.2024