‘Jazz Sessions’ par puartâ i students ai concierts

E tache la gnove edizion di “Jazz Sessions”, un progjet inviât vie pal an scolastic 2022/23, dedicât ai students des scuelis secondariis di prin e secont grât, ideât e curât par Euritmica di Silvia Colle, cu la partecipazion artistiche e progjetuâl di Alessio Velliscig e Claudio Parrino. “Jazz Sessions” e je une ativitât specifiche di ricercje, disvilup e inovazion de associazion, che e à l’obietîf principâl di incressi e di cualificâ la partecipazion dai zovins ai concierts di musiche jazz, aes variis tipologjiis de musiche moderne e dal spetacul dal vîf. Il progjet al cjaparà dentri intal cors dal an scolastic 2023/24 passe 600 students dai istitûts Stringher, Malignani, Uccellis, Zanon, Percoto, Marinelli, Copernico e CPIA – Centri Provinciâl Istruzion adults. (A.I.) – 10.11.2023