Il teme de violence di gjenar al jentre a teatri vinars ai 28 tal “Giovanni da Udine” cu la conference conciert “Carmen – il presit de libertât”, dentri de Stagjon di opare, oparete e danze firmade de diretore artistiche Fiorenza Cedolins. L’apontament al è intitulât a un personaç simbul dal riviel feminin: la ziganarie Carmen, figure centrâl de omonime opare mestre di Georges Bizet, che e paie cu la vite il dinei ae sumission a un om. La interpretazion di cualchi pagjine splendide de “Carmen” a 150 agns de sô prime rapresentazion e sarà fate dal sopran Paoletta Marrocu e dal tenôr Manuel Epis, acompagnâts al piano di Daniele Bonini. Tantis lis ospitis espertis inte tutele des vitimis e intal contrast ae violence di gjenar, che a saran presints al dopli apontament, di buinore e sot sere. (A.I.) – 27.03.2025
Foto di M.M. Scelzi
