La comedie, une ‘art’ par De Filippo

Dopo vê fat il debut al Piccolo Teatro Strelher di Milan, il regjist Fausto Russo Alesi, vincidôr di trê premis Ubu, al rive sul palc dal Teatri Gnûf “Giovanni da Udine” cu la rileture di “L’arte della commedia”, une des oparis mestris di Eduardo De Filippo. Il spetacul al sarà in sene martars ai 7 aes 8.30 sot sere pe rassegne Tempi Unici, inte uniche date par Friûl, Venit e Trentin. Scrite intal 1964, la straordenarie opare dal grant dramaturc, atôr e regjist napoletan e fâs part de racuelte dai “dì dispar”, lis comediis che a frontin lis cuistions dificilis e lis problematichis dal vivi cuotidian, des relazions privadis e publichis tra i oms. (A.I.) – 06.11.2023