La ricjece de diversitât sunade di Nicola Milan

Al è un spetacul che al vûl dâ vôs al valôr de diversitât, viodude tant che ricjece. Simbul, in musiche, di integrazion e rispiet: te suaze de Stagjon dal Teatri Stabil Furlan, vinars ai 6 di Dicembar, il Teatri Palamostre di Udin al ospitarà “Restiamo Umani”, di Nicola Milan: musiche e vôs si zontin intun viaç unic e plen di emozion, une ode ae pâs, intun timp là che, masse dispès, si fevele di vuere, si stice la asse e si trasformin lis diferencis in muraiis impussibilis di passâ. “Restiamo Umani” al fevele dut câs ancje di rispiet pe Mari tiere, di leams cu lis propriis lidrîs e, midiant dal lengaç universâl de musiche, di condivision, dialic, fradilance. Il spetacul al cambie e si insiore cun ogni toc, intune sucession di stîi e di sunôrs diviers. La musiche strumentâl e vocâl si alternin e a cressin in maniere graduâl, cjapant la atenzion dal public e menantlu par man intun itinerari musicâl origjinâl. L’atôr Paolo Mutti, invezit, al introdusarà i tocs, preparant i scoltadôrs cun leturis che a tocjin o judantju inte comprension dai tescj, in maniere di fâ deventâ la performance un vêr spetacul di musiche e di peraulis. La musiche origjinâl, firmade propit di Nicola Milan, lu viodarà esibîsi cul pianoforte e la armoniche. Cun lui a saran ancje Alessio Zoratto al liron e oud; Francesca Koka al violin; Pietro Sponton aes percussions e ae batarie. Lis lôr notis si slargjaran intune cu lis vôs dal côr VocinVolo – Ritmea di Udin, direzût di Lucia Follador e fat di zovins dai 8 ai 20 agns. (A.I.) – 05.12.2024