Al rive ancje intal circuit Ert “Sior Todero Brontolon”, une produzion dal Teatri Stabil dal Friûl-Vignesie Julie cu la regjie di Paolo Valerio, che al à dât a Franco Branciaroli il rûl dal “salvadi” dal titul. La comedie di Carlo Goldoni e larà in sene martars ai 4 tal Teatri “Zancanaro” di Sacîl, miercus ai 5 tal Auditorium “Biagio Marin” di Grau e joibe ai 6 tal Teatri Sociâl di Glemone. A completâ il cast di atôrs a son ancje I Piccoli di Podrecca, ven a stâi i marionets ideâts e puartâts al sucès inte prime metât dal Nûfcent dal cividin Vittorio Podrecca. Scrit intal 1761, il test al conte la storie di un om avâr, arogant e prepotent, piturant cun grande modernitât il conflit jenfri vecjo e gnûf, la autoritât patriarcjâl e la emancipazion feminine. (A.I.) – 03.03.2025
Foto di S. De Luca
