La Mafie contade ai fantats cence peraulis

Di miercus ai 13 a vinars ai 15 (cuntun spetacul di matine, joibe ai 14, dome pes scuelis) la rassegne ‘Innesti”, ideade di artistiAssociati, e ospite a Gardiscje, te Sale “Bergamas”, il spetacul “Casa Nostra”, pe regjie di Riccardo Reina, che al à vinçût il premi “Scenario Infanzia” 2020, e il premi de critiche Direction Under 30. Il progjet al è ispirât de sentence storiche dal Tribunâl di Palermo sul procès Stât-Mafia e al torne a puartâ su la superficie de nestre memorie un toc di passât che al è deventât za storie, ma che al va a pericul di colâ inte dismentie, cun ducj i siei paradòs e lis sôs contradizions. Il spetacul al è pensât par un public di fantats, provant di rivâ a lôr cuntun lengaç fat di imagjins e simbui, cence peraulis. (A.I.) – 12.12.2023