La musiche in vile e tache cuntun rapper roman-furlan

I arbui a son al centri de vincjesime cuarte edizion di “Musica in Villa”, la rassegne inmaneade dal PIC, il progjet integrât culture dal Friûl di Mieç – che al fâs trente agns! – in vilis e cjasis storichis dal teritori. Elements tipics de zone, ancje i arbui a saran protagoniscj dal festival, che al vierzarà i apontaments cu la presentazion di chescj “zigants de memorie” par cure di esperts o cun itineraris vuidâts. I 18 concierts fint ai 31 di Avost tai 17 Comuns dal Pic a tachin joibe ai 4 te Vile Ottelio Savorgnan, a Ariis di Rivignan. Il prin ospit al è il Piotta, ven a stâi Tommaso Zanello, l’innomenât rapper roman di famee furlane. Nassûts in Friûl a son ancje i doi ospits che a vegnin dopo: il pianist Luca Ciut a Listize ai 7 e il sunadôr di armoniche Paolo Forte ai 11 a Merêt di Tombe. (A.I.) – 02.07.2024