La oparete: tant che lâ in feriis de realtât

Un titul che al è jentrât inte storie, “Al cavallino bianco”, la comedie musicâl di Ralph Benatzky, al rive miercus ai 21 tal Teatri “Pasolini” di Cjasarse. Anel di colegament fra oparete, riviste e comedie musicâl, il spetacul al jere stât concepît cuntune modernitât inusuâl par un public che al veve voie di lâ ator pal mont. La gnove produzion de Compagnie “Corrado Abbati”, cun musiche dal vîf e regjie dal stes Mestri, e à volût creâ un spetacul che al sarà un viaç vivarôs, divertent e colorât, tant che lâ in feriis de realtât intun lûc dulà che al è il bonspirt. Une bufule di ilusion che e devente realtât par une serade fate di dialics gustôs, musichis imortâls e zûcs coreografics. (A.I.) – 20.02.2024